სიახლეები

სახელმწიფო დაცვის სპეციალურ სამსახურს 17 წელი შეუსრულდა

დღეს საქართველოს იუსტიციის სამინისტროს ეროვნულ არქივში  საქართველოს სახელმწიფო დაცვის სპეციალური სამსახურის შექმნის დღისადმი მიძღვნილი საზეიმო ღონისძიება გაიმართა. საგამოფენო დარბაზში სახელმწიფო დაცვის სპეციალური სამსახურის ჩვიდმეტწლიანი ისტორიის ამსახველი ფოტომასალა იყო წარმოდგენილი.   ღონისძიების მონაწილეებს სიტყვით მიმართა საქართველოს სახელმწიფო დაცვის სამსახურის უფროსის მოადგილემ, სამსახურის ადმინისტრაციის უფროსმა დავით ბესტავაშვილმა, რომელმაც უწყების მნიშვნელობაზე, გაწეულ მუშაობასა და სამომავლო გეგმებზე ისაუბრა.  "სახელმწიფო დაცვის სპეციალური სამსახურის პირადი შემადგენლობა ყოველთვის ხალხის და ქვეყნის ერთგული იქნება და თავის წვლილს შეიტანს საქართველოს სახელმწიფოებრივი აღმშენებლობის საპატიო მისიაში", - აღნიშნა ბესტავაშვილმა.   შეკრებილებს იუბილე ასევე, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა გიორგი ბარამიძემ მიულოცა. შეხვედრას ესწრებოდა ისრაელის  ელჩი საქართველოში.  საზეიმო ღონისძიებაზე საქართველოს სახელმწიფო დაცვის სამსახურის უფროსმა, სახელმწიფო დაცვის გენერალ-მაიორმა  თეიმურაზ ჯანაშიამ სამსახურებრივი მოვალეობის კეთილსინდისიერად შესრულებისა და სანიმუშო დისციპლინისთვის სიგელით დააჯილდოვა სამსახურის 27 თანამშრომელი. (იხ. ფოტოალბომი)